印度菜有個性，甜膩、香辣、香料味濃，不是人人受得起，好似Octobeez成員王麗嘉（Rika）就話：「最初都有啲驚，但自從朋友帶我食過之後，就一試愛上！」從加拿大食到返香港，走進剛搬了新舖的印度餐廳Bombay Dreams，Rika即被外形潮爆似銀鼓的Bling Bling烤爐所吸引，仲搶食新鮮出「爐」燒雞添呀！
餐廳Bombay Dreams開業多年，老闆是印度人，能煮出味道正宗的印度菜。相對於舊舖，新店除了更上幾層樓，內櫳亦來個時尚包裝：透明廚房，還有新增酒櫃，大可棄乳酪飲品Lassi而配襯紅、白酒；菜式方面則請來印度名廚I.R. Qureshi重新設計餐單，還將賣相變得精緻，感覺耳目一新！
而新店最吸引Rika的，相信是透明廚房內的閃爆烤爐，這種黏土製烤爐，內裏設計傳統，專門炮製Tandoori、Nann Bread及Roti，但因其特別製造的銀外殼，所以每個造價高達港幣15萬！兩個烤爐並排，就如兩隻大鼓一樣，可合奏美味樂章。Rika只需安坐一旁，便可透過玻璃看到大廚如何烤製美食。
烤雞未上枱，Rika已心急想食：「我好鍾意食Tandoori Chicken，覺得好香好好味。仲有Nann Bread同Roti，點咖喱食最正。」這位澱粉質女生，每次食印度菜都會柯打Nann Bread同Roti，仲可以一人獨食全籃，佢話：「食包可以當飯嘛，況且Nann Bread有好多種口味，蒜蓉、香草同薯仔咁，淨食又得，點咖喱又好，而Roti用麥粉造，味道特別又健康。」
得Rika大讚的燒雞嫩滑多汁，背後經過大廚一番努力，像以自家製乳酪及辣椒醬等醃幾小時，還將印度來的香料親自研磨，才夠風味，當然少不了火候控制及大廚的手藝，由準備工作到上枱，就已經過多重步驟。想知印度菜會用上甚麼香料，餐廳就由大廳到廚房，都放滿一樽樽玻璃瓶的香料，像月桂葉、茴香籽、玫瑰花瓣、辣椒、豆蔻等，裝飾得像展覽館，看得這「鬼妹仔」入神。
話說回來，這位來自加拿大的中越混血兒，本來對印度菜無興趣：「初初驚香料味太勁，但自從有朋友喺加拿大帶過我去食Tandoori Chicken及辣炒飯後，即時愛上咗，仲試過有2、3個月，每星期都要食一次印度自助餐，諗起都瘋狂。加拿大有個叫Downtown Toronto的區，最出名食印度菜，大家一講就知碇！」
留言列表
